Mrs. Pratap Singh jaakar Manju ko seedhiyon se lekar aayi aur ek bade sinhasan jaisi chair par bitha diya. Uska munh abhi bhi uske pallu se dhaka hua tha. Usne lamba sa ghunghat liya hua tha.

Veer apne rishtedaron ke beech baitha tha. Sabhi auratein Manju ke ird-gird baith gayin.

Sabse pehle ek budhi dadi aayi aur dheere se Manju ka ghunghat upar kiya. Use dekhkar boli, "Kaafi sundar bahu laayi ho, Mrs. Pratap Singh."

Yeh sunkar Veer ke chehre par halki si muskaan aa gayi. Ek-ek karke saari auratein Manju ka ghunghat upar karke use dekhne lagi aur uske haath mein tohfe aur lifaafe pakadane lagi.

Jab muh dikhai ki rasam khatm hui, tab Mrs. Pratap Singh ne Manju ko uthaya aur dheere se bola, "Ab tum apne room mein chali jao."

Manju dheere-dheere ghunghat liye wapas seedhiyon ki taraf ja rahi thi. Seedhiyon par chadhte hi achanak se Manju ka pair mud gaya aur woh girne wali thi. Tabhi Veer ki nazar padi aur woh bhaag kar Manju ke paas gaya.

Manju ko woh pakad to nahi paaya, par Manju Veer ke upar gir gayi, jisse Manju ko koi chot nahi aayi. Lekin Manju ekdum Veer ke upar thi.

Un dono ke chehre aamne-saamne the. Veer aur Manju bas ek-doosre ko ek tak dekhe ja rahe the. Un dono ki saansein jaise tham si gayin. Woh ek-doosre ki garam saansein mehsoos kar rahe the.

Peeche se daadi ne theka maara, tabhi Manju hosh mein aayi aur uthne ki koshish ki.

Uthne ki koshish mein woh wapas phisal kar Veer par gir gayi. Aur is baar sirf giri nahi thi...

Manju ke hont seedha Veer ke honton se ja mile.

Veer ne is baare mein socha tha, par itni jaldi nahi. Use andar hi andar khushi ho rahi thi, lekin sabke saamne woh sharma gaya.

Manju is hadse se kaafi chonk gayi. Woh jaldi se uthi aur chhat ki taraf bhaag gayi.

Sabne unki first kiss dekh li, jo sirf unke beech honi chahiye thi, woh sabke saamne ho gayi. Yeh baat Veer soch raha tha, lekin Manju to yeh sab kabhi nahi chahti thi.

Veer bhi wahan se uthkar chhat ki taraf bhaaga. Manju chhat par khadi ro rahi thi. Veer uske paas gaya aur gehri awaaz mein bola, "Tumhe so jana chahiye..."

Manju rote hue palti aur boli, "Kyun kiya tumne yeh?"

Veer ne kaha, "Kya?"

Manju boli, "Kyun tumne yeh shaadi nahi roki?"

Veer ne koi jawab nahi diya.

Manju apni masoom si aankhon se behte aansuon ke saath phir boli, "Sahi hai... ab tum kyun mere sawalon ka jawab doge!?"

Veer ne Manju se nazrein churate hue kaha, "Kuch cheezein badli nahi jaa sakti."

Manju ne rote hue gusse bhari muskaan di aur apne room ki taraf chalne lagi. Veer uske peeche-peeche chal raha tha.

Room ki taraf ja rahe the. Aage Manju thi aur peeche-peeche Veer. Tabhi ekdum se light chali gayi.

Manju ko andhere se bahut dar lagta hai. Light jaate hi woh dar gayi aur peeche bhaagi. Seedha Veer ki chhaati se ja takraayi. Use mehsoos ho gaya ki Veer hai. Usne kuch na dekha, na samjha, bas Veer ko kas ke hug kar liya. Uska gaal Veer ki chhaati par tha.

Manju ko Veer ki dhadkan sunaai de rahi thi. Woh zor-zor se dhadakne lagi kyunki Manju ne use hug kar liya tha. Dar ki wajah se Manju ki aankhen band thi.

Ekdum se light aa gayi.

Veer ne Manju ki baazu apne dono haathon se pakdi aur use apne seene se halka sa alag karte hue bola, "Aankhen kholo... light aa gayi."

Manju ne halki si aankhen kholi aur uske saamne Veer khada tha. Use ehsaas hua ki jisse woh door rehne ko keh rahi thi, usi ko woh khud hug kar rahi thi.

Manju ne jaldi se Veer ko dhakka diya aur palatkar room mein bhaag gayi.

Veer hansne laga aur khush bhi hone laga ki yeh jaise khud ko dikha rahi hai, waisi bilkul bhi nahi hai.

Veer washroom se bahar aaya, kapde change karke. Usne dekha ki Manju bed ke paas neeche apni beautiful white short maxi mein baithi hui ro rahi hai. Woh apne pair ko dekh rahi thi, jis par chot lagi thi.

Veer ki nazar uske pair par padi. Manju ne jaldi se apne aansu ponch liye.

Veer uske paas jaakar neeche baith gaya aur bola, "Dard ho raha hai to chhupao mat."

Manju ne dabi hui awaaz mein kaha, "Mujhe dard nahi ho raha."

Veer ne first aid box mein se ek cream nikali aur wapas uske paas aakar baith gaya.

Manju ne dekha ki use meri fikr ho rahi hai. Veer ne Manju ka pair apne haathon mein liya aur cream lagane laga. Phir bola, "To phir aapki aankhen itni bheegi hui kyun hain?"

Manju use dekhti reh gayi. Usne kuch nahi bola. Veer ne Manju ka pair chhodkar uski edi pakdi aur Manju ko dekhne laga. Manju bhi use hi dekh rahi thi.

Veer apni chintit aur pyaari awaaz mein bola, "Main aapko rote hue nahi dekh sakta, Manju."

Manju chonk gayi. "Yeh achanak se aisi baatein kyun kar raha hai!?" Manju abhi bhi Veer ko hi dekhe ja rahi thi.

Veer ne apni baat poori karte hue kaha, "Pata nahi kyun, par mera khoon kholne lagta hai jab main aapko rote hue dekhta hoon."

Manju ki gusse bhari nazron mein ek pal ke liye halka sa pyaar jhalak utha. Tabhi Manju ko apna ateet yaad aa gaya...

Jo Rohan ne uske saath kiya... jo uske khud ke maa-baap ne uske saath kiya... wahi nahi, jo Veer ke maa-baap ne aur Veer ne khud kiya...

"Meri zindagi barbaad ho gayi. Main tum sab ko kabhi maaf nahi kar sakti."

Yeh yaad aate hi Manju ne Veer ka haath apni edi se hata diya aur uthne lagi. Lekin usse utha nahi gaya. Uske pair mein kaafi zyada dard hone laga. Veer peeche baitha dekh raha tha. Use bilkul achha nahi lag raha tha ki Manju itne dard mein tadap rahi hai.

Woh uthkar aaya aur Manju ko peeche se apni baahon mein utha liya.

Manju chonk gayi aur gusse mein boli, "Mujhe neeche utaaro!"

Woh use maarne lagi, lekin Veer ne ek na suni. Woh use bed tak lekar gaya aur wahan use aaraam se lita diya.

Usne Manju ko galat tareeke se nahi chhua aur yeh baat Manju ko achhi tarah pata thi.

Veer wapas sofa par sone chala gaya. Manju ne blanket odh li aur lete-lete Veer ko dekhti rahi.

Agle din Manju abhi bhi so rahi thi, lekin uski blanket idhar-udhar ho rakhi thi. Veer utha aur use blanket achhe se odha di. Phir woh nahane chala gaya.

Manju uthi. Ab uske pair mein utna dard nahi tha. Use kaafi achha lag raha tha. Tabhi Veer ne washroom ka darwaza khola.

Manju ne uski taraf dekha aur zor se chillayi, "Veeeeerrrrrrrrr!!"

Kyunki Veer tall, handsome aur attractive tha. Uski fit body par sirf lower body ke gird ek towel bandha hua tha. Nahakar aane ki wajah se uske geele baalon se paani ki boonden tapak rahi thi.

Veer Manju ko chillate dekh khush hua aur bola...

Aage jaane ke liye padhte rahiye.......